ADVERTENCIA IMPORTANTE

Érbedo” é un grupo sendeirista non federado formado por amig@s que se xuntan libre e conscientemente para realizar rutas a pé. Polo tanto, ao non contar cun seguro colectivo, cada persoa que participa debe facerse responsábel da súa seguridade e de calquera contratempo ou accidente que poida acontecer. Por isto, recoméndase: 1.-Acudir ás rutas co equipamento adecuado. 2.-Contar cun seguro individual que cubra calquera continxencia non desexada.

01/10/21

TRANSFORMACIÓN DO GRUPO ÉRBEDO DE SENDEIRISMO EN CLUB FEDERADO DE SENDEIRISMO

 

O Érbedo no Anamao

Estimados compañeiros de camiñatas: A moitos xa vos temos anunciado os cambios que queremos establecer no ÉRBEDO co simple ánimo de camiñar tranquilos sen a presión de que algún día os que organizamos as rutas teñamos que asumir unha RESPONSABILIDADE CIVIL OU PENAL polo simple feito de sermos GUÍAS "BENÉVOLOS".

Xa no período no que estivemos confinados por mor da pandemia, unha lectura accidental alertounos dos riscos que estabamos a asumir. Desde ese momento a nosa perspectiva do sendeirismo foi outra.

Non nos gusta a burocracia nin as formalidades que isto conleva, pero entendemos que é a única maneira de que todos poidamos gozar tranquilos dunha xornada de sendeirismo.

Todo o que puidemos ler indícanos que debemos formalizar e federar o Club e facer un Seguro de Responsabilidade Civil. Un suxeito xurídico sería o responsable e nunca unha persoa física.

Nestas páxinas  (das moitas que se poderían  abrir) de INTERNET podedes consultar o estado da cuestión:

CAMINANDO POR AQUÍ

ECMABOGADA

EL GUÍA BENÉVOLO

AIDEABOGADOS

NOMADASCREW

Para facermos o CLUB debemos iniciar, se contamos cun número de socios apropiado, os seguintes trámites:

1) Dar información a todos os que camiñastes no Érbedo e pedir a vosa conformidade e adhesión para ser socios dese futuro Club.

2) Facer unha asamblea de socios e elixir Xunta Directiva. Propoñemos que sexa no final da ruta que celebraremos en Lousame  e Toxosoutos o día 16 de outubro.

3) Elaborar uns Estatutos do Club Deportivo.

4) Rexistrar o Club na Xunta de Galicia.

5) Abrir unha conta bancaria a nome do Club.

6) Obter un Código de Identificación Fiscal.

7) Federar o Club na Federación de Montañismo (Isto ten un custo de 300 € unha única vez na vida do Club).

8) Comprar e Rexistrar os Catro Libros que se esixen (de Socios, de Contas, de Actas e Libro de Diario)

9) Obter a certificación negativa de denominación.

10) Pagar as taxas.

11) Subscribir un seguro de Responsabilidade Civil

O Club non tería nunca ánimo de lucro. 

E para o seu funcionamento establecerase unha cota de incrición de 30 € e unha cota anual de 20 - 25 € e esixirase que os socios estean federados individualmente (moitos xa estades federados na actualidade). Iso custa 72 € anuais. 

Facendo un cálculo, o primeiro ano sairíanos a conta por 120 ou 130 € ano (coa federación individual). Nos anos sucesivos o custo estaría entre 90 ou 100 € (tamén coa ficha federativa individual).

Nos anos sucesivos establecerase unha cota de inscrición de 40 € para os novos socios.

Aquí temos unha proposta de Seguro de Responsabilidade Civil para un número máximo de 25 socios.



O funcionamento do Club:
-Fariamos unha ruta mensual de xornada completa, con percorridos promedio de 18 kms.
-Unha ruta intermedia entre as mensuais, de media xornada, con percorridos promedios de 12 kms.
-O ámbito das rutas serían as catro provincias galegas, Asturias, León, Zamora e norte de Portugal.
-Unha vez ao ano fariamos unha  saída de varios días para realizar unha ou dúas rutas en provincias que quedan fóra das antes citadas, nun radio de 200 - 400 Kms.
- Probablemente renunciemos a organizar moitas ceas que viñamos celebrando no final das rutas, porque nos decatamos de que aqueles que retornamos aos domicilios despois da cea, vimos expostos ao perigo dun accidente por cansancio e polo sopor da propia cea. Iso non impide en que nalgunhas circunstancias propicias poidamos celebrar algunha cea. No seu lugar, cada trimestre faremos unha ruta de mañá e remataremos xantando xuntos nun restaurante, reservando para a sobremesa algunha visita cultural, con desprazamento nos coches.

Os desprazamentos nas rutas seguirían como ata a actualidade, nos coches particulares. E nalgunhas ocasións especiais poderiamos contratar un autobús.

AGORA SÓ CÓMPRE QUE NOS DIGADES EXPRESAMENTE QUEN DESEXA SER SOCIO DESTE CLUB. 
Cos socios cos que contemos faremos nos vindeiros días a asamblea constitucional. 
Pretendemos que o Club estea operativo para xaneiro de 2022.
Crearemos un novo Whatsapp cos socios que se inscriban no Club e anularemos o Érbedo Puro para non molestar con mensaxes reiteradas aos non socios.




Ningún comentario:

Publicar un comentario