ADVERTENCIA IMPORTANTE

Érbedo” é un grupo sendeirista non federado formado por amig@s que se xuntan libre e conscientemente para realizar rutas a pé. Polo tanto, ao non contar cun seguro colectivo, cada persoa que participa debe facerse responsábel da súa seguridade e de calquera contratempo ou accidente que poida acontecer. Por isto, recoméndase: 1.-Acudir ás rutas co equipamento adecuado. 2.-Contar cun seguro individual que cubra calquera continxencia non desexada.

14/06/16

RUTA DA MARRONDA - ALTO EO

SÁBADO, 2 DE XUÑO 2016
ANÓTATE AQUÍ (antes do 29 de xuño)
No municipio de Baleira (Lugo) atópase o PRG-145, a Ruta da Marronda – Alto Eo, un percorrido que nos ofrece a oportunidade de coñecer un anaquiño da comarca da Fonsagrada. Afastada dos grandes núcleos de poboación e das vías de comunicación relevantes, ofrece unha paisaxe rica e case virxe nunha das zonas máis descoñecidas de Galicia. A Fraga da Marronda, de gran valor ecolóxico e cinexético, e o nacemento do río Eo son os protagonistas do camiño (Turgalicia).


Seguindo a suxestión do grupo Acivro, imos variar algo o percorrido oficial deste sendeiro, o que nos vai permitir visitar a fraga da Marronda. Deste xeito a distancia a percorrer ascende aos 25 km. cunha dificultade media-alta.
 

O PRG-145 orixinal:

 

Puntos de interese: San Paio, Cabreira, Río Eo, Fervenza da Acea de Serra, Fervenza do Pozo da Ferreira, Capela da Pastora, A Cortevella, Miradoiro do Muiño, Fraga da Marronda, Pena da Raia.

Acceso: na A-6, á altura da cidade de Lugo, coller a saída 493 para enlazar coa LU-530 cara á Fonsagrada (por Castroverde). No Cádavo habémonos desviar pola LU-760 cara a Fonteo, e tras cruzar este núcleo collemos a LU-P-0405 cara a San Paio.

https://goo.gl/maps/sSbiHerPST32


Saída de Lalín: 7.30, diante da estación de autobuses
Punto de encontro: 9.00 hotel-restaurante Moneda, O Cádavo








Cea: O Recuncho de Pepe e María, en Cobelas (Castroverede)

01/06/16

RUTA GUENDE - FOXO DO LOBO - FONTEFRÍA - AS GRALLEIRAS - SALGUEIRO - POZO DAS OLAS (SERRA DO XURÉS)

SÁBADO 4 - XUÑO - 2016
VER RUTA EN WIKILOC
O sábado 4 de xuño de 2016 fomos ao Xurés-Gerês, reserva da biosfera, zona á que acudimos nunha cita anual irrenunciable. Tanto é o seu atractivo inabarcable! Iniciamos o percurso en Guende para avanzar cara o Foxo do Lobo, trampa ancestral para dar caza á alimaña temida. Desde o Foxo pronto se avistou o perfil impoñente do Fontefría. Dura ascensión e conquista dos horizontes desde o cumio. Desde alí, en subida máis calmosa agardábannos as cristas de As Gralleiras, xa na raia con Portugal,  desde onde avistamos Pitões das Júnias e a inmensidade montañeira de Montalegre. As formacións rochosas, esculpidas pacientemente polo teimudo cicel da erosión, espertaron en nós a lóxica admiración nas formas e na desproporcionada magnitude. 
Continuamos camiño en descenso cara a  Salgueiro (aldea abandonada, na que a Xunta de Galicia emprendeu hai tempo unha restauración integral, aínda inacabada. Os edificios restaurados xa precisan unha segunda remoción ). Máis adiante esperábannos as fermosísimas pozas do río Mao (Pozo das Olas). Desde este río, monte a través, pronto arribamos de novo a Guende. A xornada completouse cun baño reparador no SPA termal de Lobios e coa visita ao castelo e aos espigueiros de Lindoso. Cea no restaurante Lindo Verde de Lindoso.
Dezanove quilómetros intensos e esixentes, densos de contido. Historia, etnografía, natureza en estado puro, inmensas panorámicas, montañas elevadas e alonxadas do trafego humano, a rocha espida e convertida en escultura dos ventos. Admirar tanta beleza só ten o custe de adentarse na montaña e percorrela en compañía.

GUENDE



FOXO DO LOBO DE GUENDE





PICO DE FONTEFRÍA E AS GRALLEIRAS







ALDEA DE  SALGUEIRO





POZO DAS OLAS NO RÍO MAO